Home

ርዕሰ አድባራት ለንደን ደብረ ጽዮን ቅድስት ማርያም የኢትዮጵያ ኦርቶዶክስ ተዋሕዶ ቤተክርስቲያን Re’ese Adbarat St. Mary of Debre Tsion Ethiopian Orthodox Tewahedo Church, London

የ፳፻፱ ዓ.ም. (2017 እ.ኤ.አ) የትንሣኤ በዓል አገልግሎት አስመልክቶ ከርዕሰ አድባራት ለንደን ደብረ ጽዮን ቅድስት ማርያም ቤተክርስቲያን ሰበካ አስተዳደር ጉባኤ የተሰጠ መግለጫ

የተወደዳችሁ የክርስቶስ ቤተሰቦች !
የርዕሰ አድባራት ለንደን ደብረ ጽዮን ቅድስት ማርያም ካህናት፣ ምእመናን እና የሰ/ት/ቤት አባላት በሙሉ፤

በደብሩ በተፈጠረው አለመግባባት የተነሳ በተለይም የይገባናል ጥያቄ ያነሱ ወገኖች ለከፍተኛው ፍርድ ቤት ባቀረቡት ክስ ምክንያት በየካቲት ወር ፳፻፯ ዓ.ም. (February 2015) ጀምሮ ከሳሾቹ ቤተ ክርስቲያኑን በየሁለት ሳምንቱ በፈረቃ ቅዳሜን እና አሑድን ከንጋቱ 11 ሰዓት (5am)  እስከ እኩለ ሌሊት (Midnight) በተፈቀደላቸው ሰዓት “permitted hours” ለመጠቀም እንዲችሉ በጠበቆቻቸው በኩል የቀረበውን ረቂቅ ተቀብሎ ትዕዛዝ ያስተላለፈ ሲሆን፤ ከላይ ከተጠቀሰው የመጠቀሚያ ቀንና ሰዓት “permitted hours” ውጪ በሌሎቹ ዕለታትና ሰዓታት ተከሳሾች እንደምርጫቸው መጠቀም እንደሚችሉ በፍርድ ቤቱ ት ዕዛዝ አንቀጽ ሦስት (3) ላይ በግልጽ ተቀምጧል።

ከዚያን ጊዜ ጀምሮ ዋናው ጉዳይ መፍትሔ እስከሚያገኝ ድረስ ፍርድ ቤቱ በሰጠው ትዕዛዝ መሠረት በመጠቀም ላይ ብንሆንም ከሳሾቹ ባለፈው ዓመት የትንሣኤ ዋዜማ እስከ እኩለ ሌሊት ተጠቅመው ቤተክርስቲያኑን ለቀው መውጣት ሲገባቸው የቤተክርስቲያኑን በር በውጥ በኩል ቆልፈው በፈጠሩት አላስፈላጊ ግርግር በመቶዎች የሚቆጠሩ ምእመናን፣ ሕጻናትና ሽማግሌዎች ጭምር ከፍተኛ መጉላላት እንዲደርስባቸው አድርገዋል።

ይሁን እንጂ የበለጠ ችግር ከመፈጠሩ አስቀድሞ የፖሊስ ኃይል በቦታው ተገኝቶ ቤተክርስቲያኑን ለቀው እንዲወጡ ሲያደርጋቸው በትዕግሥት በውጭ ቆመው የሚጠብቁ ምእመናንን በመሳደብና በመማታት አላስፈላጊ ብጥብጥ እና ግጭት እንዲቀሰቀስ ለማድረግ የሞከሩ ቢሆንም በምእመናኑ ትዕግሥት የተመኙት ብጥብጥና ግጭት ሳይነሳ በሰላም አልፏል።

በዘንድሮውም ዓመት ቤተክርስቲያኑን እስከ እኩለ ሌሊት ተጠቅመው መውጣት እንዳለባቸው በፍርድ ቤቱ ትዕዛዝ ላይ በግልጽ ተቀምጦ ሳለ በማይመለከታቸው ጉዳይ “ተከሳሾቹ ከ5am በፊት መግባት አይችሉም” የሚል የተሳሳተ ጥቅስ በመጥቀስ ሁከትና ብጥብጥ የሚቀሰቅስ መልእክት እንዳስተላለፉ ተረድተናል።

ይህንኑ ጉዳይ በተመለከተ ባለፈው ሳምንት (5 April 2017) በሕግ ጠበቆቻቸው በኩል ለከሳሾች ደብዳቤ የተጻፈላቸው ሲሆን ለአካባቢው የፖሊስ ጽ/ቤት ግልባጭ ተደርጓል። ይህንኑ ተከትሎ ትናንት ሚያዚያ ፫ ቀን ፳፻፱ (11 April 2017) የሰበካ አስተዳደር ጉባኤ አባላት፣ የካህናት እና የምእመናን ተወካዮች በፖሊስ ጽ/ቤት በአካል በመገኘት ጉዳዩን አስረድተናል።

በዚሁም መሠረት ከሳሾች በፍርድ ቤት የተፈቀደላቸውን ጊዜ ጠብቀው ቤተክርስቲያኑን እስከ እኩለ ሌሊት ተጠቅመው ከመውጣት በቀር ሌሎችን አይገቡም የማለት መብት የሌላቸው መሆኑ በሁሉም ዘንድ በግልጽ እንዲታወቅ እንወዳለን። ስለዚህ በሁሉም በኩል የሚገኙ ምዕመናን የፍርድ ቤቱን ትዕዛዝ ትክክለኛ አባባል ተረድተው ይህንኑ ትዕዛዝ አክብረው ለመጠቀም እንዲችሉ በጥብቅ እናሳስባለን።

በዓሉን በጸሎተ ቅዳሴ ለማክበር የምትሹ ምእመናን በቤተ ክርስቲያናችን ቀኖና መሠረት እኩለ ሌሊት ላይ ቤተክርስቲያኑ ከተለቀቀ በኋላ የሚሰጠው የቅዳሴ አገልግሎት እስከሚጀመር ድረስ በቤተክርስቲያኑ ቅጽረ ግቢ በምናዘጋጀው ድንኳን ውስጥ በትዕግሥትና በጸጥታ እንድትጠብቁ በትህትና እንጠይቃለን።

የደብሩ ሰበካ አስተዳደር ጉባኤ ጽ/ቤት
ሚያዚያ ፬ ቀን ፳፻፱ ዓ.ም. (12 April 2017)
Ethiopian Orthodox Tewahedo Church, St Mary of Debre Tsion, London, P O Box 42200, SW8 3RN Registered Charity No: 1060394